District chanchin

Champhai hi Mizoram State hmarchhak lampanga awm a ni a, India leh Myanmar inrina bul lawk a awm a ni.

Kum 1500 – 1800 AD chho bawr vel a India ram awptu British mite lo chhinchiah dan atanga a lan dan chuan khawchhak lam atang lo tla thla hmasa ber te chu Fenngo hnam ho te an ni. An ni ho hian an khuate chu an hnam peng hming anng deuh in Chawnchhin te, Lawihmun tih te in an lo phuah thin a ni. Hmanlai thil pawimawh chi hrang hrang: Lungphun lian tak te, Chhura farep,Chawngchilhi kai, Mura puk leh Sikpui lung te leh pawimawh tak tak tam tak Champhai leh a chhehvel ram ah te hian an awm a ni.Kum 1864 khan, Vanhnuailiana chu Pasaltha hmingthang,Vanapa (Thangzachhinga) leh a thuih hruaite chuan Champhai ram ah hian an lo kal a. Tichuan, Vanhnuailiana chu Lawihmun Lal (Chief) ah a awm a, a nu (mother) chu Chawnchhim lal ah a awm ta bawk a ni. Kum 1871 a Vanhnuailiana a thih khan a nupui Ropuiliani chuan Chawnchhim lal nihna a chhawm chho ta zel a ni.

Champhai hi kum 1998 khan District khawpui ber atana puan a ni a, Bawrhsap hnathawhna hmun pawh hi ni 22 Tau thla, 1998 atang khan  hawn a ni a. Pu Hmingthanzuala, IAS chu Bawrhsap hmasa ber a ni nghe nghe.

Champhai District hian boruak thiang nuam tak mai a nei a, khualzin mite tan phei chuan kal ngei ngei na tur a ni. Mizoram Buh zem an lo tih thin hial a, phaizawl zau leh buh chinna hmun chu he khaw bul thutah hian a inpharh duai bawk a ni.

Ramri mai a khawpui awm a nih avang hian sumdawnna kawngah pawh a hmunpui a ni a, thenawm ram nen nasa takin in sumdawn tawnna an kalpui reng a ni.Tin, Champhai hi hmanlai pi leh pute hmun hlui hmuhnawm leh chanchin ngah tak tak, leh ropui tak tak awmna hmun a ni a. Mizote chanchin kan sawi dawn chuan Champhai lam atanga bul tanin Champhaiah bawk a tawp leh thin an lo ti hial thin a ni.