Hmun pawimawh
Champhai District chhunga hmun pawimawh leh mi hip thei tak tak te hetah hian tarlan a ni e:
Rih Dil
Rih Dil hi Champhai atanga Km 22 a hla, Myanmar ramchhunga awm a ni a, Rihdil hian mizote rilru ah hmun pawimawh tak a luah a, chu chu mitthi thlarau kalkawng ni a an ngaihna hi a ni. Rihdil hi Tawka (Heart sign) ang takin a awm a, a thlalak ringawt pawhin mi a hip hle. Rihdil hian chanchin angah hle a, tui luanchhuahna leh hnar mumal a nei lo hi a makna lai chu a ni. A zau zawng chu a dung km 1, a vang 70 metres lai a ni bawk. Rihdil hian thawnthu ngaihnawm tak tak a nei a, rihdil tlawh tur hian Champhai District, Deputy Commissioner Office-ah phalna la in engtik lai pawhin a tlawh theih a ni.
Kungawrhi Puk
Champhai atanga lehlanga kal phak, khualzin mitena an tlawh fo chu Kungawrhi puk hi a ni. Kungawrhi puk hi farkawn ramchhunga awm a ni a, tlang pangah puk lian tak leh zau tak a ni. He puk hi kan pipu te chuan thlarau/lasi ho te kalkawng ni in an ngai a, he lai lei hnuaiah hian khua neiin hei hi an kalkawng ber niin an ring. He puk atang hian hmanlaiin Kungawrhi kha Ramhuai ho khan leihnuai khua ah an hnuk lut thin ni in an ngai a ni.
Lianchhiari Lunglen Tlang
Lianchhiari lunglentlang hi dungtlang khawchungah a awm a,Lianchhiari lunglen tlang hi tlangchhip thlen hma deuh hleka lung tohlawt, khawhawina tura siam ni awmtak a ni a, hetah hian Lianchhiari chuan a bialpa Chawngfianga a thlir thin a ni. He tlang hian mizo thawnthu ah hmun pawimawh tak leh ngaihnawm tak a chang a ni.Lianchhiari lunglen tlang hi champhai atang Km 64 ah a awm, tlawhtu a ngah thei hle.
Thasiama Seno Neihna
Thasiama se no neihna hi tlangbawk sang tak, khawkrawk tak leh mihring tan pawh kal harsa khawp a ni a, Vaphai khawdaia awm a ni. He tlangbawk chhipah hian Thasiama sial (Mithun) hian no a nei a, sial chu sawi loh mihring tan pawh a kal harsa anih avangin mak tih a hlawh hle a, tlawhtu pawh a ngah thei hle a ni. Thawnthu a alan dan chuan hetianga mihring pawh kal theih mang lohna hmuna sialin no a han neih theihna chhan chu Thasiama hi lasi (Fairy) nula Chawngtinleri nen an inzawl a, Chawngtinleri hian thasiama chu malsawmin seno tam tak neiturin mal a sawm a, chuvang chuan he sial pawh hi chawngtinlerin a hruai a ni an ti.
Mangkhaia Lung
Lungphun danglam tak Mizo lal Mangkhaia phun a ni a, he lungah hian mak tak maiin mihring lem in tiat lo tak tak te ker a ni a,enge a entir tih chu hre chiah lo mahila ziak leh chhiar kan thiam hma hauh pawhin hma chu an lo sawn tawh viau a ni tih a ti lang bawk. A bulah hian thlan dang Mangkhaia lung ai te zawk engemaw zat a awm bawk. Tunah he lung hi Champhai Zotlangah hmuh theiha humhalh mek a ni.
Fiara Tui
Mizo chanchin a thawnthu ngaihnawm tak nei Fiara tui hi Champhai atanga Km 65 Vaphai khaw daiah a awm a, he tui hi tan tlang pang lungpui kar atanga lo chhuak a ni.Fiara hi hmeithai fa a ni a, tuikhur tui an chan ve theih loh avangin a beidawng chuan tui a zawng ta chiam mai a, tichuan he tui lungpui kar atanga rawn chhuak hi hmufuhin uluk takin a chhin a, a nu nen chauh an chawi thin. Mahse a lo rei hnu chuan an khua te pawh chuan hre ve in an chawi pui ve ta a ni. A hmu chhuaktu Fiara hming chawiin tun thlengin Fiara tui an tih phah ta a ni.
Sikpui Lung
Sikpui lung hi sikpui kut an hman dawna khuangpute tan an an rem thin a ni a, he lungpui chungah hian kut an hman dawnin khuangputen lam hma hruaiin bul an rawn tan thin a ni anti. He sikpui kut hi hmar hnam hote kut a ni a,an chintanna hi hriat mai theih a ni tawh lo.heng hmar ho hian kumtin kut hi an hmang thin a, Shan hoin an rawn tihbuai hma chu he kut hi an hmang a ni. He lungah hian “HE LUNG HI HMANLAI HMAR HO SIKPUINA A NI.TIN, KEINI KUM 28.2.1918 AH HIAN KAN AWM TAN TA. JAHULA SAILO” tih a in ziak bawk. L.Keivom I.F.S ziah dan chuan heng hnam te hi tunthlengin an la awm a,a then Bishenpur, Manipurah, a then Senvon ah te an awm bawk.Heng thlan veilama lo lang te hi Saisu hnim an ni a, damdawi atan atangkai hle. Sikpui lung hi a history lakna tur a vang hle a, a tam zawk hi L.Keivom I.F.S retired lehkhabu ziak atang a hmuh te an ni.
Lamsial Puk
Lamsial puk hi farkawn khua, Champhai District ah a awm a, puk liantak niin he puk atang hian ruhro tam tak hai chhuah tawh a ni. He puk a ruhro te hi thilhlui chhinchhiahna a landan chuan lamsial khua te hi an thenawm khua te nen an indo vak mai a, chu indona ah chuan pasaltha tam tak an thi a, a then te phei chu he pukah hian a nung chunga phum an ni hial a sawi a ni bawk. He puk hi thlan ang mai an hman a lo nih avang hian leh lamah chuan a rapthlak hle a tih theih bawk.
Mura Puk
Mura puk hi Champhai Zote khawchungah a awm a, khawpuichhung atanga km 10 ah a awm a, he puk hi paruk lai a ni. He puk hi engtik lai atanga hman tan nge hriat chiah a ni lo a, thawnthu a an sawi dan chuan hmanlaiin mura lian tak mai mihring lak ching a awm a. in chungah fu in a meilam chuan kawmchar lam atangin a hawlh a, tichuan a chhunga awm te chu kawngka pui lamah an tlan chhuak thin a, chu chu mura chuan a lo la ta thin a ni. Mura laka inven nan chuan heng Mura puk te hi an lo siam phah ta a ni.
Vangchhia
India leh Myanmar ramri hnaih taka awm Vangchhia khaw daiah hian hmanlai pi leh pute sulhnu ni ngei a hriat lung ker mawi tak tak leh lian tak tak a awm teuh mai a . Hemi chungchang zirchiang tur hian India rama hmanlai pi leh pute sulhnu chhuitu leh humhalhtu Archeological Survey of India te koh luh an ni a. Anni hian ngun takin helai hmun hi an zirchiang a, thil tam tak la hai lan lohte pawh an hmuhchhuah belh nual tawh a ni. ASI te hian ngun taka zir chho zelin tun dinhmunah chuan hmanlai khawpui hlui lian tak ni ngei turin an ngai tawh a, he hmunah hian lung ker mawi tak tak leh ngaihtuahna ti thui thei tak tak a awm teuh mai a ni. Vangchhia hi Mizoram chhunga Archelogical Survey lamin hmun humhalh an neih chhun a ni nghe nghe.